Pas një viti të tërë kërkimesh, sondazhesh dhe konsultimesh me individë e intelektualë nga shtresa të ndryshme të shoqërisë, veçanërisht me ata që i përkasin fushës së artit dhe kulturës, më 7 qershor 2023, u zhvillua një takim historik në katin e dytë të Hotel Tiranës. Ky takim, i mbajtur mes disa figurave të shquara të jetës publike dhe kulturore shqiptare, u përqendrua në krijimin e një lëvizjeje të re, me karakter të fortë patriotik dhe kulturor.
Të pranishmit në këtë event të rëndësishëm përfshinin figura të njohura si Pjetër Marku, Kryetar i Akademisë së Artit, Shkencës dhe Letrave të Mirditës dhe Drejtor i revistës “Mirdita”; Perikli Shuli, figurë publike dhe Ambasador për Paqen; Bedri Jashari, kaskador dhe artist i shquar i kinematografisë shqiptare; Faik Xhani, gazetar, mësues dhe Mjeshtër i Madh; Kadri Dauti, ushtarak dhe punonjës sigurie në ambasadën gjermane, si dhe shumë të tjerë.
Në këtë takim, u diskutua gjendja aktuale e kombit shqiptar dhe u arrit në përfundimin se situata kërkon veprime të shpejta dhe konkrete. Përballë sfidave kombëtare dhe kulturore, të pranishmit vendosën për krijimin e një Lëvizjeje Atdhetare Patriotike. Ky ishte një vendim historik, i mbështetur mbi bindjen se Shqipëria ka nevojë për një organizatë të përkushtuar që do të promovojë vlerat kombëtare, do të mbrojë trashëgiminë kulturore dhe do të nxisë bashkimin kombëtar.
Kjo lëvizje synon të mbledhë shqiptarët nga të gjitha trevat dhe diaspora, për të promovuar dhe ruajtur pasuritë kulturore të kombit tonë, si dhe për të përforcuar ndjenjën e unitetit kombëtar. E formuar nga figura të njohura publike dhe kulturore, ajo përfaqëson një përpjekje për të frymëzuar të rinjtë dhe brezat e ardhshëm për të ruajtur dhe përçuar vlerat që na kanë mbajtur të bashkuar si komb ndër shekuj.
Lëvizja Atdhetare Iliria vjen si një dritare e re shprese për të gjithë ata që duan të shohin Shqipërinë të lulëzojë si një komb krenar, i bashkuar dhe me një trashëgimi kulturore të pacenuar.